MARKO MILJANOV

U drugo (na drugo mjesto) sam kaza kako se blizakaju i traže jedan drugoga plemena u Staru Srbiju i Brda i Crnu Goru. Tako se diči svoj sa svojijem, ne gledajući što su im vjere razdvojene, te više paze prevjerena braća u Staru Srbiju nas u Brda i Crnu Goru no mi nji u Staru Srbiju; prijed bi oni rizikali da učine što za nas no mi za nji. Oni se čak mogu i svadit pregoneći se čija je bolja svojta. Evo primjer jedan kako se svojta pazi: Turčin neki u Staru Srbiju ubio je i posjeka Kuča, pa je priča društvu kako je ubio Kuča i pośeka. Ondar Murat-aga Galić, podrijetlom Kuč, pripita ga: »A, bogati, kad ga pośeče, reče li ti što taj Kuč?«  Turčin odgovori ladno: »Reče mi samo jednu riječ!« Murat-aga: »A koja je to riječ!«  Turčin: »Reče mi,ne posijeci me, ja sam Kuč, imam braće Kuča, – koji te me osvetit’!«  Murat-aga reče: »Pa nije te laža, ja sam mu brat«, pa uzdi kumburom nasred prsi.
Turčin pade mrtav, a Murat-aga uteče u goru, te je mlogo strada od suda turskoga. Ali on se dičio doklen je gođ živ bio što je osvetio Kuča kojemu nije ni imena zna, samo je zna da je Kuč! Murat-aga bio je zabit poslije u Berane i Bijelo Polje. Doskora je živio.  Tako se po cijela plemena oko svojte mogu svadit, ka beruško pleme oko Kuča koje živi u Đakovicu, Prizren i Peć; gaško oko Bjelopavlića; kastrinicko oko Vasojevića itd.

                                                                                                         “Primjeri čojstva i junaštva”

Prch.me